پروفسور محمد تقی زهتابی نین دونیادان کؤچمه سی نین ایل دؤنومو:
اورمو اؤیرنجی سی:بو گون دی آیی نین بیری اونودولماز عالیم رحمتلیک پروفسور محمد تقی زهتابی نین تانری یا قووشدوغو گوندور.1378-جی ایل همین گونده پروفسور گؤزله نیلمدن ! دوغما یوردو اولان شبستر شهرین ده همیشه لیک اولاراق دونیاسینی دییشیب و بوتون تورک دونیاسینی اؤزللیکله آذربایجان میللتینی کدرلندیردی.
اورمو اؤیرنجی سی دئپاتاتی اولاراق بو گونو خاطیرلاییب پروفسورون »افسانه دی شمشیره دایانمازسا آزادلیق» شعرین سیز عزیز اوخوجولارا تقدیم ائدیریک:
چکدیکده قیلینجین،
جوشدوقدا دنیزتک،
توفان کیمی اورمانلاری تیترتدیگی آنلار
دوشمن کیریییب آغلادی مسکین.
باش ایدی غلام تک اونا سولطانلار، اوزانلار،
زحمت چکن انسانا اؤلوم حؤکمو یازانلار،
میللتلرینن دیللرینه قبر قازانلار...
×××
قویدوقدا قینا اودلو قیلینجین،
سونبوللری بیچدیکده یایین ایستی چاغیندا،
دوشمن دؤنرک آسلانا گلدی،
سونگویله اونون زحمتینین یاریسین آلدی،
آج قالدی قیشین شاختالی، چووغونلو چاغیندا،
بیر سؤز دئمه دی سینه سی میس تک یانان
/آسلان
/کیمی اینسان!!
سونگویله بوتون ثروتینی چالدی،آپاردی،
زینداندا چوروتدو
آسلانلاری بیر- بیر،
حؤکمونده یوروتدو،
بئینین ده قازیب اینجی قوپارتدی؛
تاریخینی آلت- اوست ائله ییب یازدی تازاشدان؛
بیر آبیده ده تیکمک اوچون وئرمه دی ایمکان؛
اوولکی لری ائیله دی ویران...
دؤزدو گئنه ده سینه سی میس تک یانان
/آسلان
/کیمی اینسان!!
قلبینده سه عیصیان.
×××
بیر گونده گلیب ایسته دی توپراقدان
/آییرسین اونو دوشمان.
بیر فیکره دالیب سوسدو بو آسلان
/کیمی اینسان
/و دوشوندو:
آرخامدی بو توپراق،
شنلیکده بوساطیم دؤشنن یئر،
پیس گونده دایاق،
/همده سیغینجاق
توپراق
/اگر اولمازسا نه یییم وار و نه یم من؟
توفانلی دنیزلرده اوزن بیر اؤلو یارپاق!
مین بیر اولو بابک کیمی اجدادلاریم آنجاق
بوردا یاشاییب،عمر سوروب،گؤمدورولوبلر
چیخسام وطنیمدن،
هاردان آلارام قان،
هاردان گله جک جیسمیمه قوت،
/و جسارت
/و همییت؟
هاردا قازیلار سون بئشیگیم بس؟
کولی دئیر اولادیما هر کس...
نفرت دولو گؤزله
بیر دوشمنی سوزدو،
هئرکول کیمی جانلاندی گؤزونده
ایستیر آیاغین یئردن اوزوب آنتئیی بوغسون...
داغلار گوجو حیس ائتدی اؤزونده،
قلبینده قانی کوکره دی، جوشدو،
قیزغین شئره دؤندو
سانکی بو سفر سینه سی میس تک یانان
/آسلان
/کیمی اینسان!!
آیدینجا گؤزونده آلیشان شعله گؤروندو؛
کین اؤرتوگونه سانکی بوتون وارلیغی بیر آندا بوروندو.
سیخدی کوره گین توپراغا دوشمنله دیدیشدی.
قوپمام-دئدی – اؤلسم ده بو یئردن،
/بو دیاردان.
کئچمیش بابالاردان،
/آتالاردان
ارثیم دی بو داغلار،
/بو بولاقلار،
/بو اتکلر،
/بو چیچکلر...
اولادیما ارثیم گرک اولسون بو دیاریم.
توپراقدی منیم دار و نداریم.
داغلارجا فلاکت،
عمانجادا موحنت
/و اذیت
بیر دمده بئله آغناسا گر اوستومه قوپمام.....
آز قالدی جوشا سینه سی میس تک یانان
/آسلان
/کیمی اینسان!!
قلبینده یامان چاغادی عیصیان
توفانلی دنیز تک!!
×××
کئچمیش لری خاطیرلادی دوشمن،
بیر واختلاری کی،سینه سی میس تک یانان
/آسلان
/کیمی اینسان!!
چکمیشدی قیلینجین...
-قوی جوشماسین عمان-
/دئیه،قلبینده جه آرام،
دوشمن گئری دؤندو...
اولدو سحر،آخشام،
کئچدی نئچه ایام،
/قوجامان سینه سی میس تک یانان آتشی سؤندو.
سوندو گئنه گؤزلرده قیغیلجیم
/و دورولدو
گؤزلر کیمی هر یاندا بولاقلار
/و ایشیقلاندی چیراقلار؛
سونبوللری ده بیچدی اوراقلار؛
قیشلار دولانیب،کئچدی سازاقلار؛
بیر آزجا گولوش گؤردو دوداقلار؛
دینجلدی آیاقلار
/و باجاقلار،
هر یاندا بوساطین دؤشه دی دوزلره یازلار،
آذر گؤزه لین چولغادی نازلار،
دیللندی یاماجلاردا یئنه نغمه لی سازلار:
عزیزیم گولوم واردیر،
وفالی ائلیم واردیر،
وطنیم تالاندیسا،
وارلیغیم،دیلیم واردیر...
توتدو گؤزونو اویغوایلان چالمیش،آمما
بیر آندا بئله یاتمادی دوشمن.
هر گون یئنی بیر حیله دوشوندو،
هر ایل یئنی بیر دوندا گؤروندو،
عاریفلرینی توپلایاراق،قوردو ییغینجاق،
تا بلکه تاپا مینمه گه بیر تازا اویونجاق.
سون تدبیری ساده:
لازیمدی ده گیشسین
زحمتله بوتون وارلیغی یوغرولموش اولان،
/سینه سی میس تک یانانی اؤزلوگو آنجاق.
گر اؤزلوگون آلساق،
گر منلیگینی،کیملیگینی آلساق الیندن،
توپراقدا بیزیمدیر،
داغ،دوز،دره،اوتلاقدا بیزیمدیر،
تکجه نه کی نعمت، نه کی معدن،
نعمت یارادان قول،قولوموزدور؛
آلساق دیلینی،اؤزلوگو یوخ بیر قولوموزدور...
×××
دوشمن یاساق ائتدی، وئره رک بیر اولو فرمان
زحمتله سعادت آرایان،
/سینه سی میس تک یانانی دوغما دیلیندن.
اینسانلیغی لذتله قارین،پولدا بیلنلر،
قارین ایزی ایله سورولر تک سوروننلر،
معنادا دئییل،ظاهیراً اینسان گؤروننلر،
اؤز وارلیغین افسانه سایانلار،
اینسان کیمی لر بال کیمی دیلین آتدی؛
نعمتلره،
/لذتلره،
/شهرتلره
/چاتدی.
اینسانلیغینی بیر قارینا، بیر پولا ساتدی.
آیریلدی دیلیندن،
آیریلدی ائلیندن.
کئچمیش کیمی لاکین قو جامان
/سینه سی میس تک یانان
/آسلان،
داییم باخاراق غملی گئدنلر دالیسینجا،
اینسانلیغی،میللیتی جوشدو،
قلبینده قانی جوشدو و داشدی،
جیسمینده گوجو حدینی آشدی،
ووردو قوتله بئلی بیر آرشین یئره چکدی،
خوشبختلیگین تاپدی یئریندن
/وتریندن.
یئللر پوزا بیلمز قوجامان داغلارین
/آیدیندی ووقارین.
قانون-طبیعتدی درین کؤکلو چینارلار،
یارپاقلارینی تؤکسده توفاندا،سازاقدا،
آزاد گونشه دوغرو دمادم بوی آتارلار،
موحکم دی کؤکو چون آنا توپراقدا،
/بولاقدا؛
اؤلموش قورو یاپراقلاری
/سالماز چیناری
/ذره جه ده اولسا ووقاردان،عظمتدن!!
سرسم یئله اویموش
یارپاقلارین آمما،
یئللر گومورر هر بیرین آخیر
بیر گوشه ده،بیر قبرده ایتگین.
×××
بئش یاپراق ایله اؤزلوک آلینماز،
قیرخیلسا توک،اینسان کیشیلیکدن کی سالینماز،
"لازیم دی دگیشسین دیلی بو سینه سی میس تک یانان"
سون امرینی دوشمن بئله وئردی.
×××
دوشمن گله رک سؤیله دی:
آت دوغما دیلین بیر کره،حتی
آت اسکی شعورون
/و دوشون تکجه منیم تک.
سن
/منسن
/ازلدن.
مجبور ائله ییبلر کی،اوزاقلاشمیسان اؤز دوغما دیلین دن.
بیگانه دیلین بوشلا سن،ال چک....
فیکره دالاراق سوسدو بیر آن
/سینه سی میس تک یانان
/آسلان
/کیمی اینسان!!
مومکوندو مگر آیریلیم اؤز دوغما دیلیمدن؟
مومکونسه ده،آخیر نه سببدن؟
دیلدیر منی آنجاق ائله ین
/من!!
اؤزگه کیمی،بیلمم،نئجه مومکوندو دوشونمک؟
مومکونمو قارانلیق اولا شیمشک؟!
ائتمیش،دئمه لی،اؤزلوگومو،وارلیغیمی ایندی نیشانه.
قویمام آتا،قویموشسادا دوشمن بو اوخون ایندی کمانه.
ساکیت دنیزی چالخادی توفان.
هر مؤحنته دؤزموش قوجامان
/سینه سی میس تک یانان
/آسلان کیمی اینسان!!
یوخ،یوخ-دئیرک،چکدی قیلینجین
دیل؟؟!!
/شوخلوق بو دئییل،بیل.
شمشیرلره چئوریلدی اوراقلار،
عمان کیمی یاخینلار و اوزاقلار،
سرنیزه یه دؤندو گؤزل اللرده داراقلار....
دوشمن کیریییب آغلادی میسکین.
آیریلدی خیالدان،
بیر امر-ماحالدان،
هم بیلدی کی،اولماز بو ائلین
/اؤزلوگونو آلماق الیندن.
اولماز کی،آییرماق بیر ائلی دوغما دیلیندن.
×××
بیر گون دئدی اوولادینا یای فصلی بیچینده:
کئچمیش بوتون عؤمروم تر ایچینده؛
من قویمامیشام یوغرولا بیر خمیریم اؤزگه تریندن،
اولسون گؤزوز آنجاق ایشینیزده،قولونوزدا،
محکم دایانین اؤز یولونوزدا...
آردیندا و لاکین، امه گین اولماسا شمشیر،
هر گون چؤره گه دامجیلایار قان.
هر گون گؤره جکدیر شرفیز بیر یئنی تحقیر،
هر گون چکه جکدیر باشینیز بیر یئنی ذیللت،
تحقیر ائده جک ساغ، ووراجاق سول سیزه تهمت،
یوردوز اولاجاق دوغما اؤز اوولادیزا غوربت،
هر کس سیزه ایستر اولا سولطان،
/آغا،سرور،
داییم آج اولار قارنیز،الیز لئیک خمیرده،
شنلیک بینالی آتلی اولار، خلق پیاده،
یاس حالی اولار ائلده سراسر،
غوربتده و دوستاقدا حایاتین چورودو مرد اوغوللار،
وئرمز اولاراق یاد گوجو مئیدان،
قولدورلارین آغزیندا اولار
آزادلیغیز، حاققیز،
تحقیر اولار هر گوشه ده، هر وقتده اینسان،
بیگانه لر اوینار دیلینیز، وارلیغینیزلا،
سربستلیگیز، شادلیغینیزلا،
اولماز آدینیز دونیادا میللتلر ایچینده،
شهرتینیز ایتر همشه شهرتلر ایچینده،
قلبیز کیمی ویرانه قالار دوغما دیاریز،
یول گئسه ده ائل،کؤلگه کیمین قویمایاجاق ایز،
قارین سوراغی ایله سورولر تک گئده جکسیز.
اللرده اوراقلار
بیر آغزی قیلینج اولسا و لاکین،
دوشمن ده سیزه دوست اولاجاقدیر،
هر کس ائده جکدیر سیزه حؤرمت،
ائللر سیزی اینسان سایاجاقلار،
چون قایدادی شمشیره دایانمیشدیر عدالت
/و شرافت.
یوردوزلا برابر
آزادلیغیز، حاققیز اولاجاق اؤز الینیزده،
تحقیر اوزو گؤرمز ائلینیزده،
/دیلینیزده.
دونیا تانییار سیزلری میللت،
ائللر ائله یر میللته حؤرمت.
حاققین قیلینجی وارسا اگر حاق تانییارلار.
قودرتلی و آماده گر اولسان،
داییم سنی اینسان سانایارلار،
هئچ کیمسه ده جرأت اولا بیلمز
/آغالیق فیکرینه دوشسون
/سنه بیر آن!!
بلی، بالالار قوی قالا داییم قولاغیزدا
ایش واختیدا شمشیرینیز اولسون قوجاغیزدا!
افسانه دی شمشیره دایانمازسا آزادلیق!!....
هئچ واخت قینا قویما قیلینجین
